بغيت نفتح كتاب الورد والنوار
بغيت نقول علاش البحر ازرق
بغيت نحاكي الشمس ولقمار
ونجمع النجوم فطبق
ونفرق الفرحة انوار
وبالفرحة بميات كف نصفق
بغيت نقلب علبسمة فقاع الدار
بلا ما نجي لكل باب دار ندق
نحط الناس ونكحل عليهوم لشفار
ودرعاني قلادة تحاوط كل عنق
نهدر علحب وكلامي يكون أشعار
نوصف قوس الرحمن والرعاد ولبرق
نوصف قوام النسا ونغازل لبكار
لقيت كلامي خدام فيا يخنق
لو ما شفت ما ريت ما تسوق ليا لخبار
يتقال عليا راجل احمق
لو ما ريت لغذر بالنهار الكهار
وناس تخلص ثارها بالنار وبالدق
قلبت على عشاقين العقل ولفكار
عشاقين الحق وكلمة الصدق
لقيت غير شلاهبي وسمسار
يبع فيك ويشري بلا ما يرفق
غير قاطع يدو من الرحمة شفار
او غيرحيت ما لقى ما يسرق
لي ما جاراهوم فعرفهوم حمار
من غير قضيان حاجتو ما يعتق
ناس طالعين واكلين نازلين واكلين منشار
وناس ما لحقوش معاهوم شدق
منوضين كنازة وميتهوم فار
وقطهوم ايلا يزلق يطير بالرزق
زمان جنون البقر او حماق البشر
زمان ما يترقع ما يتلبق