كيف ما كانت صفاوة الما
لا بد يقيصها شويا لخوا ض
العمية عمية لبصيرة ما شي العمى
ولا الجلالة ولا البياض
قالوا البغلة ما تولد
واليوم ولدت
غدا تسمع الفروج حتى هو باض
العرصات لي نعرف ازهار ونوار
كلاها شوال خروف
وغرسها ولا بني وصبار
لعيون لي نعرف سفها بوخرارب
عطارة وصبايغ عطار
فيق اوا فيق يالي ما جايب للدنيا لخبار
الجبح عمر وبقا يتمر
وجهو بساط خضر
وجوفو مرجان وجوهر
عمر الجبح بكلام بيض من النهار الكهار
شيب ريوس الكبار وقرقش عيون الصغار
لكلام تدفق بلون الدم والقيح
خلى طريق لحدورة وطلع لعقابي
كلام الصح رشا ما بقاش صحيح
عند القرجوطة وفشلو ليه الركابي
لكلام اخو لكلام قال خمم ولا تدمم
بنادم بما يسوى يتسوم
سوارت على كل باب تتورم
والعطفة بالعطفة ماشي بلي قرا ا وتعلم
اخو لكلام حسب حتى تعيا عليا انفاسي
كون يفيد فيا لكلام يفيد فيك انت
ايلا نزطط ومصاب نزطط راسي
كيف ما زطط لي لقالو مع الخوت فلتة
صبر ايلا فيك شي ما تصبر ابو محمصة طيابة
لو كان يربح التحنقيز كون طفروها لقرودة
طعمو برنيقش بالعنب ولا اسمو برنيعنب العنابة
لا هما ربحو ولا خلاو ما ياكل الطير والدودة
آبا زيد او زيدا خونا وانت غادي تدور وتتبرم
الخدمة نص نص خدمة بهيمة لي خاصها نداه
الخير مدفق والرزق موجود وتقول الزهر مكرم
تدير كيف الزا وق وايلا جات فيك تقول اواه اواه
قلبت حتى سواد لي فبنادم حتى قلت الوقت عواج
قربت نطلق كلامي بالثلاث من قوة ما بنادم دلو خاوي
بالكلمة يتعرفو الرجالة ماشي بطلوع رشوق ومزاج
ولا بالنخوة علخوا والرجل فوق رجل والقعدة فلقهاوي