متهيألى

متهيألى...

إنك لما تموت ح تطير

وتزفك م الأرض ملايكة

أصل مافيش م النوع ده كتير... !!

طيب جدا...

جدا جدا...

زى النسمة ف حر بؤنة

زى اللى قلوبهم سبقونا

يملوا الجنة قلوب عصافير... !!

صبرك كان إعجاز ويا دوب

اتعلم منك "أيوب"

حلمك كان بيراضى قلوب

مهما الدنيا تعصى الغير!!!

عشت مسامح حتى ف حقك

تسعد غيرك لو من "بؤك"

مهما الدنيا ف كرب تزوقك

قلبك صامد... حر... كبير... !!

بس خلاص العود أهو شاخ

والمشوار ف الآخر باخ

عقلك شت... ولف... وداخ

مش لاقى لوضعك تفسير... !!