إمتحانك... صعب هانك
فوقت لما الحظ... خانك
واللى منك لما شافك
حتى مش زعلان عشانك... !!
مهما ضاق الوقت بيك
مهما ضاق الحال عليك
اللى وقت الشدة باعك
إمتى يرجع يشتريك... ؟!!
لما يبقى ف يوم مكانك... !!
ف إمتحانك... !!
قالوا مال العشق سايب
مش جمايل... ليها رد... !!
حتى وإنتوا إتنين حبايب
راح تقابل حيطة سد... !!
وأما تبقى ف يوم ف حوجة
فجأة تبقى السكة عوجة
واللى يعمل فيها ناصح
واللى يعمل فيها خوجة... !!
واللى "بيملص" ودانك... !!
ف إمتحانك... !!
مهما تعمل برضو ساقط
م الدفاتر... وحساباتهم
بس لو عديت... وراقت
يعملوك من أهل بيتهم... !!
يمين العين بصيرة
بس هى الإيد قصيرة
واللى راح أهو راح وعدا
ننسى ونفضوها سيرة... !!
ده إحنا شوفنا الموت عشانك... !!
ف إمتحانك... !!