دريشة الحزن مجفيه لهاصوت وزفير
كل ما تطارت سوالف لي هنا محزنه
ذكرت حصه وخيباتي وموتة ضمير
وأشياء ماهي بواقع فرض ولاممكنه
كنت اتحاشا أشيل جروح عنها كثير
وأهرب بهالكون منها وأختلق أزمنه
ركضت لأول حدود الارض وأخر أخير
غربال حزني ووجع شاعر بكى يلعنه
يحس صدره فيافي وطير فيها يطير
يكتب قصايد عظيمه ماتخون ألسنه
يارب حصه يارب الجرح لو هو كبير
راح أكثر العمر والباقي هنا ما أضمنه
يهزمني الدمع لويطرون حصه واصير
مثل الصغير ان تهادى يمها وأحضنه
فراشة الورد والبسمات جلسة عصير
( أشياء جميله لقلبي بس ما تفتنه)
من ضمنها وجه حصه لاتنافح عبير
لو يوزن العمر في ميزان هو أثمنه
كل ماتهامل عزيز الدمع منها غزير
يتكتل الهم فيني ومن بكاي أعجنه
وأسوق نفسي على باقي بعاد وهجير
وأتذكر أن وجه حصه له زمن وأمكنه
الله لو كل صبحي في رجاها بخير
يمديه وضعي مع الايام ياما أحسنه
لاهبت الريح والتحنان وضعه خطير
أهزل حنيني يسده في عناي أسمنه
زفرت أخر جروح الدرب فرقاومصير
يوم الحزن كان لي مفروض ما احزنه
جسدت اخر شعور البال يومه مثير
لدموع وجهي وظلمي وقمت ألعنه