وجهي مباديه خانت طيب مبداها
وتثاقل الحزن سربه واورقت دومه
تساقطت من غثى عيني ويغشاها
وجه ابتسامه جميل وزايره نومه
يطش لوعات عمري يحذف اشياها
يندب عصافير أبطت مالها حومه
بنت الترف فارق المظلوم طرياها
نسا مضارب غلاها واعتزل قومه
ياعنك حزني مراثي الشعر بكاها
حتى تردت قواه وفزت عزومه
أبكي على قلوب ماتبغاني أبغاها
وأشتاق لوجيه زود هجرها لومه
هي خلت العمر في ظلمات فرقاها
يشبه حياتي تقل سودا ومهمومه
علمتها الخوف يومي كنت بنساها
وهي علمتني شعور العفو وسلومه
وصاتك ان مت تقرا بيوت فحواها
اخر مواجع واغاني روح معدومه
هي عارفه بدعوة المظلوم تلقاها
ويديه ماهي فوجه الله مهزومه
حاربت ربعي عشان الحب ورضاها
وكتبت نفسي قصايدحزن مظلومه
إي والله إني وعهد الله ما أنساها
ولاهي مع الوقت بالنسيان ملزومه
أهديتها دموع عيني بيوم ذكراها
واهدتني الحزن كله واسود هدومه