معنيني حزن عيا بحياتي لايفض جدال
كتبته بالقصيد اللي يحبه قلت يقراني
هنا يامال غنت له وجرت صوتها يامال
بعد مشوار من سكه طويله جاي يبلاني
يعاقبني على طول السنين المقبله ولازال
يمنيني بلحظات الغياب( وليت )ينساني
يوصيني على سكةضياعي في وجيه اللال
يعذرب طيبتي وأردى فعولي أصل جداني
كبرت العازب اللي كان يتمنى يجيه أطفال
بكاه أعظم قصيده يوم بارو فيه خلاني
على سالف ذكرحصه وطاري حينا وظلال
وقفت أشكي بعد مامات ابوي لسورجيراني
"كثير الدمع ما عابه على حره بكى رجال"
يعيبه موقفه دام النوايا طبعها إنساني
كتبت الكلمة الحلوة عشانه دمعها لا سال
يزيد الضيم مع جور الزمان ونوح قيفاني
رميت رشاي ضميانه ودلوي ماانصفته حبال
تبعت أسراب ديمومه بها كل الضمأ جاني
تذكرني طيور الصبح فيها يوم كنا عيال
بعدما لوحت لأصفر يباسي أخضر أغصاني
رهيفه كنها ضامر ( عيوف ) ولا لها منزال
سوى هاك الدعا يارب حصه بظلم عدواني
تقل ! جنه بها مافيه لا ساحر .. ولا دجال
(حديث الله يسردها على محرابه إيماني)
كثر ماخانت أمالي ظنوني بالليال ليال
عددما خافت عيوني سوالف دمع حرماني
تمر سنين تتغير أوادم بين حال وحال !!
وحصه ما تمالك نفسها من قصة أحزاني