انا يرعاني الله وانت ما يرعاك ربي ليه
مادام الموت لامن حل له اوقات معلومه
تبي تعرف وش الفارق بين اللا وبين الإيه
مثل ماتفرق اهل الطيب عاداته عن سلومه
وصل هذا القهر حده وبقا ياظالمي لك تيه
اضيع بكل غاياته وتضيق بجسمي هدومه
من الصبح الذي جابك على غربالي اللي فيه
لذاك الليل من عشته عليل البال وهمومه
انا من هالمرض شفني كرهتك من كثر مابيه
غلاك بداخلي يوم المشاعر فيك ملزومه
قصايد تحتظر بين الحنايا ويكثر التشريه
تهامل دمعها مثل القراح اللي رما غيومه
تخيل من كثر ماصرت أكسرخاطري وارضيه
بقت دعوات في نفسي من الخذلان مظلومه
تنهدتك غياب وقلت (ياقلب) العنا وشفيه
ليالي عمري الفايت معاك سنين محرومه
انا ماأشبه أحد غيري ومابي ياولد تشبيه
ولا بشري معاك الود مثل العام و أسومه
وقفت بأخر ايامي اعاتب من رداك وجيه
تمنت روحي البيضا تذل بحرب محسومه
امانه لا حظر وقت الموادع وأفتقد غاليه
ابي تشرح له بإيجاز عن ما فات بقدومه
وداع وسكة الفرقا طويله وعاشقك تغليه
شواطي بحرها يبكي على غنجا ومعزومه
لقاها الشعر تتهندم بفوضى مبهره وتحكيه
تطاول حسنها أغلى منازل فيه مهدومه
هنا الواقع بدا يكمل وبقى له مشهدن انهيه
بقصة حزني الاتي وسوالف حلمي ونومه
درت ميعاد او غادة وش الفارق لوانه ايه
انا ماني رجل ثرثار وما هي بنت مهضومه
تروح سنين تنساني تبيع العمر او تشريه
على جثماني المرهف هنا الايام مصدومه
شكيت البارحه همي على ابويه وردد هيه
وشخبار الفتى ناصر ماتدري وش علومه
سألني وكنت متضايق ولاجاوبته وحاديه
رجا بالله من طيحه بعدها ماحصل قومه
لو ان الوقت يرجع بي واغير للقدر ماضيه
أصير الليل واشتاقه الى من لاحت نجومه
ذبحني ياخي بسهمه يصيب البال مايخطيه
لوإن الارض تتكلم شكت من قسوة سهومه
يوصيني على منهو كثيره ما وفا لتاليه
قبل لا الموت يبراله بلحظه شبه محتومه
دخيلك وكل ضلوعي لربي صدرها كافيه
مواجع تنهمر لامن تهادى أبيات منظومه
تذكر قصة المنفى وشاعر حظه مجافيه
تغافا عنده اشياه البسيطه لاصحى لومه
خلص كل الكلام اللي يقوله وإنتبه راعيه
تماكن اخر حروف العتاب لورد يشمومه
لغيداء كانت تسولف على شيطانها تغويه
بعد كل الشعور المنتهي وأيات مهزومه
هنا ياقف بنص الدرب قلبن لاذ به لاهيه
تناسى جرحه الدامي بذاك الليل وحلومه
يناجي عمره الضايع قبل فقده ولا لاقيه
قبل ماينتشر شعر وقصايد روح مكلومه