غصن الكلام اللي تدلا عذوقه
ماطاح في ليل العتب والمشاريه
مع هالصباح اللي تهافت بروقه
يوم اشغلتني سكة الفقر والتيه
يطغى عذابي لون بهجة شروقه
في عمر لا توه ولا هوب تاليه
ماكف دمعي عن محاذير موقه
ولارضى قلبي يتحاول واباريه
الطير لا شاقت مطالع سبوقه
يمد جنحانه وتنساه رجليه
حتى تمارى به سماه وتسوقه
لاحضان وكره لاتطارت محاريه
الجرح لا ثارت مواطن عروقه
يصبح عليله مابقى شي بيديه
الله يغربل حاسدي يا خلوقه
ويجزى حبيبي بالعنا مايكفيه
يومه قتل اغلى مشاعر صدوقه
عشان دنيا وباعها مع مباديه
هذا المرض خطوات عمره سروقه
يقتل حياتي في يمينه واراعيه
ماله دوى ولا عاد يتنى لحوقه
ذاك الغريب اللي تباكت اراضيه
حاولت اقارن بالمواجع فروقه
مع ناس كانو هم يبونه ولا ابيه
انهى بياض احلامنا في مروقه
بدروب تكره جيته وكل طاريه
محبوبتي يوم الهوى ذاع سوقه
وتحالفو شعار حزني حواليه
يومي بكيتك في قصيدن طروقه
اهات صدرن به وجع منك خافيه
انا اليتيم اللي الدعاء من حقوقه
يوم إنظلم بأسباب منهو معاديه
يارب هون حلك لحدي وضوقه
لا غرد الطير الشقي لروح شاديه
ينعي غياب اللي البكا مايروقه
يوم الزمن اقفا بعمري واناديه