ليل وعوار وضيقة عيون ولسان
مل الحروف اللي سأل وشبلاها
وانا وهمي وجايرالدمع وانسان
بغربة مشاعر كان شاسع مداها
وتنهيدة الباكي و نظرات زعلان
لقلوب مقطوع الامل من رجاها
ياوجه حصه داخلي شنطةاحزان
وضلوع منكوبه حنين بهواها
أحيان يوجعني بها الليل واحيان
يجبرني انسى خاطرن ما نساها
أصدق كلامي كان للصمت عنوان
يضني مدارات الحديث ان طراها
حصه ودمعات المجاريح وأكفان
وارض الغياب اللي وصل منتهاها
ما عشت فيها يوم راضي وزعلان
مثل( القلوب) اللي خذلني رجاها
اكتب وتورق لجلها صدور واغصان
وتعيش بي مثل الفقيد ان لقاها
قد شفتها تلعب على قاف واوزان
تضحك مع النرجس ويكثر شذاها
ياهي جميله والوجع فيني الوان
وجروحي أضحى نجمها في سماها
هذا الحزن مرهف ولا هوب ندمان
(كل ما كتب قلبي قصيده بكاها)
بذاك الشعور الممتلي اه واشجان
كل ما فضت دنيا عذابي ملاها
كنه قصيده عاشت بصوت فنان
يبكي من ابياتي الرقيقه ان قراها
تناقلت حزنه من الضيقه اوطان
وعقول يرهقها الذكاء من غباها
يمطر على روحي من الويل هتان
وارعى همومه والسحايب وراها
اكثر علي البارحه ظلم واحزان
حتى لمس عوج الحنايا وجاها
من كيد ساحر ثاربه عهد شيطان
اضنا ضلوعي في خطا مو خطاها !