لي روح عاشت من الضيقات مقهوره
من ضيم الايام باحت لي سرايرها
هناك باقي بصدري جروح ممطوره
من قاسي الوقت فيني رحت ادايرها
هذا المرض صار مثل علوم مخبوره
ينهش بروحي وتصرخ له حرايرها
في ظلمة الليل ناحت منه اباجوره
تبكي من الموت والدنيا ومصايرها
غرفة حياتي من البسمات مهجورة
يستاحش الخوف من رهبةستايرها
كان العزا في بقايا .. عطري وصورة
وأشياء لامن لواني إبكاي اسايرها
أرسم متاهات بعض وجيه منثوره
في شرفة البيت وتضنيني عبايرها
وأروي عطاشا طريق الورد وزهوره
وألوم روحي على الغلطه وأعايرها
حتى تساقط حروف عتاب مقهوره
بأرض المحابر تثور اعصاب فايرها
اكتب كتابات بعض الشي مغموره
كان الورق في خبايا الحزن حايرها
يتقمص البكي وجهي ويبدع بدوره
وتدمي مكاتيب صمته بوح جايرها
الصبح طالت محاري جيته و نوره
وعيوني الياس طول الوقت زايرها
يضنيني الخوف في تموز وشهوره
لاشفت حصه تخيط اغلى زرايرها
أحتاج بسمه وكلمة صدق مقدوره
كل ماحكتني فعايل قلت صايرها
يارب تشفي جروح القلب وشعوره
لاهبت الريح في وجهي و طايرها
تعبت أترجم مشاعر نفس مقهوره
على ضفاف الهقاوي وكثر بايرها
مضارب الوقت بين ضلوع مكسوره
من ظالم الكبر تذبح بي بشايرها
الليل غيداء بلاها الفقد وشروره
من قاسي الوجد فكت لي ظفايرها