يا الله طلَبْتك يا عَليمْ
يا واحدٍ ما شَيّ خَفاهْ
تنشي لنا مْن الغرب غيم
شوامخٍ في مِبتداه
يَسْري إلى غَطّ العتيم
وتْشُوق بَرْقٍ في سماه
مثل الحرايق في الهشيم
ما تْعَرِف ليله من ضَحاه
شهرين ياخذ مستقيم
لي راح جاها من قِفاه
يِحْدَاه نسناس النسيم
كوسٍ من المطلع هواه
في الآرض سَوّى لهْ حَطيم
مثل المكاين دَفْق مَاه
شَقّ الجبل لو هو صِميم
وِمْن العَلا حَدَّر حَصاه
اظْهَر جديدٍ مع قديم
وحولين ما يِنْشَفْ ثَراه
مِ العشب تِخْضَرّ الزِميم
والسيح جاه امّا كفاه
يَحْيِي الأراضي اللي رميم
وِيْعمّ حَضَرَهْ والبْداه
ولِبْدَوي يصبح مقيم
في منزله ما حْدٍ غَثاه
أرْغَد لْقاحه والفطيم
والطِعْم ما حَدٍّ شَراه
من فضل ربَ العالمين
عن الطعام الله غَناه
هذا الحِيَا قالوا عِميم
أسْقى البحَر وَيَّا الفَلاه
من دار زايدنا الْكريم
لين السعوديّه مَداه
ابْجاه عيسى والْكَليم
ومحمدٍ خير البَراه
يا الله تْعِزّ المسلمين
على الصهاينةِ العِداه
ومن عُقْب ذا قال الفِهيم
لي بالفراق الله بَلَاه
يا الله من قلبٍ سقيم
مِ العام ما حصّل مناه
متعطّلٍ مثل اليتيم
لي ما تشَرّع في رباه
من فَقْد مضنونٍ حِشيم
هو طِبّ عوقي هو دواه
خِلٍّ أحبَّه من قديم
ما يْعيضني حَدٍّ سواه
هو طِبّ عوقي يا غشيم
انْ كان باتِنْعَتْ دْواه
ما بي هُوى ظول الحريم
بي صاحبٍ طيّب نِباه
حولين ما شفت النديم
ما ادْري جفا لو إشْ بَلاه
وِبْعِلّتي ما هو غشيم
واللي جرى لي ما خَفاه
آزمت كالبير الهِديم
لي ما تْوَرِّدْه الرعاه
يا عِزّتالي يا نديم
يا طول صبري يا وِزاه
انْ كان ذا صبرٍ مِديم
الموت واحد والحياه
وصلاة ربّ العالمين
على محمّد وانْبِياه