بادي في راس متعلي

باديٍ في راس مِتْعَلّي

من بدا به هاض مكنونه

لي ذكرت الوقت لي زَلّي

والصِّبا يوم انقضى سُونه

قام جمع العين ينْهَلّي

فوق خَدّي يوم يطرونه

وَرَّت إِلْيِهْ في الحشا عِلّي

الذخاتر ما يرومونه

وابْعَدِنْيِه من سَنَغْ خِلّي

لي عِليه النفس ممحونه

لي تذكرْتَه وانا آصلّي

ما عرفت الفَرض وِسْنونه

من فراقه طحت معتلّي

عِلّة اللي مات مضنونه

هو غناة النفس بالحِلّي

ما تِشوف الناس من دونه

لو لقيت اللي ليَ يْسَلّي

حالفٍ بالعهد ما اخونه

باوْصَلَه لو اكون ما ادِلّي

لو يحول الرَمْل من دونه

حاشمٍ نفسه من الزَلّي

والعَرَبْ بالنِّعم يَطْرُونه

له أهل مِ الضِّيف ما تْمِلّي

وِلِمْعَنَى كلّه يِعَرِفُونه

يِعْل داره يودٍ مْهِلّي

من سحابٍ تَرْعِد مْزونه

الشَّهَر هذا الذي هَلّي

ولي وَراه ولي يعدّونه

يوم وقت القيظ قد زَلّي

ما بقي شيٍ يسادونه

جاه عقب الوسْميِ العَلّي

والثرى ما حَفّ من بونه

وْلِبْدِوي من العِدّ قد شَلّي

والطُوي ما عاد يَرْدونهر

ينزلون بْراس مِتْعَلّي

والوَطَى ما هُمْ يدانونه

زين شوف النَّشر لِمْفِلّي

وسط عشبٍ مالت غْصونه

ريحته لي جاه لِمْطِلّي

مثل عطر بْنَحْر مزيونه

أو يشابِه ريحة الفِلِّي

لي بغالي المال يَشْرُونه