باقي مثل ماتعرفيني قبل كمّ عام
ان كنت باقي .. بذاكرتك ومخزونها ؟!
توّبت عنك الخفوق وْلا اهتدى واستقام
يا اقدم محابيس روحي داخل سجونها
والله انا كلّ ماعمري مشى للأمام
ودي لو ارجع ورى لايام ممنونها
ايام كانت على شاني تفيق وتنام
واضحك وانا في عيون الناس مجنونها
وصلت معها الى ابعد نقطةٍ من هيام
حتى اهلها باسمي احيانا يحرجونها
من علمتني شعور اني أعيش بسلام
من لوّنت لي حياتٍ باهتٍ لونها
من لاجلها عن كثير القلب كابر وشام
عيّآ يأثّر عليه الا اسود عيونها
مبطي قبل مايصير الوضع ماهو تمام
وتصير صعبه وهي سهله وياهونها
قبل انهم يغرقوني في سيول الملام
وهي بزيف التهم حتى يغرقونها
حطو عليها كلام وبالغو بالكلام
ياليتهم مثل ما اعْرفها يعرفونها
قالو نهيناك .. ثم سالت دموع انهزام
ماهزّهم يوم من عيني يسيحونها
كيف اطعنتني يديهم في هذيك السهام
ويديهم اكثر يدين بحاجه لعونها
منّي لها كل ماجاع الخفوق اهتمام
جوعي ل اسدّه .. بذكراها ولا اخونها
وانها لتبقى بتاريخي عليّ الحرام
بنتً رضى والديني حال من دونها