شفني وصلتك رغم ثقل المسافات
رغم الظروف المُنهكه مانسيتك !
بغيت أغيب .. وشفت كل المسارات
بالغصب تاخذني على باب بيتك !
مريت ودي بس لو اسمع اصوات
من خلف جدرانك تريّح فديتك
وجيت المكان اللي حوى منك خطوات
لاكن خساره جيته ومالقيتك
ماكني الا ماشي بشارع أموات
هدوء مزعج هدني يوم جيتك
رحلت الملم خيبة احساس بسكات
يعني تجيني لو جلست أحتريتك ؟!
ياما عمر كنت أحتريك بملذات
اختارك الخافق وجيت وبديتك
جيتك بصدق شعور وبوضح نيّات
بعت المكابر وبتواضع شريتك
اغراني الواقع ب حلو البدايات
قلت ان كل الدرب حلو ومشيتك
رحتي وخليتي حياتي متاهات
ليتك عرفتي قيمة الحب ليتك
غديت انا بعدك كثير انزواءات
وأنكرت كل الناس يومي هويتك
ماكنت متوقع معاك أنت بالذات
في يوم تطلع عكس ماني هقيتك
وماكنت لغيابك احسّب حسابات
ووصلي قبل لا تطلبينه عطيتك
نسيانك الظاهر من المستحيلات
لو اني اقوى كان مبطي جفيتك
يبقى الغرام بداخلي حي مامات
مرضت منك وللأسف ماشفيتك