حبيبتي .. لو ياصل الحرف معناه
لقيت حجه للشعر يوم اصمّه
فهم الشعور اصعب من كتاب تقراه
هذيك في يمّه وهذي بيمّه
كم لي أصبك كاس حب اتقهواه
بين الطواري واوعدك صدق ذمّه
مدري متى باخذك يا شيً ابغاه
في مايبيح الله وفقه الأئمّه
خايف تطول محاولاتي مع الجاه
وتروح يا حلم العمر قبل اتمّه
بس الأمل بالله وربي عطاياه
الكون هذا كلبوها تعمّه
هو يعرف اللي بيننا قد بنيناه
قصرً عفيف وفيه للصدق همه
جيتك وانا رجال يمشي بمبداه
مبداه فوق الارض حاجه تهمّه
رغم الجروح النازفه ماصرخ بآه
وبدمعته ماحدن عرف غير كمه
شاعر تغذى من وريد المعاناه
حضن الظروف القشر دايم يضمّه
جيتيه ذنب وصرتي اطهر خطاياه
ماحب احد غيرك بعد بوه وامه