غازل هدب عيني مسا البارح رقاد
لكن منامي عنه شيًّ منعني
فزّ النعاس .. وصبحي اصبح ولا عاد
عيّت هالارض بكبرها.. لا تسعني !
ماضي شريط الذاكره قام ينعاد
لاحداثي اللي وسط حزني تضعني
ناديت انا ياسْعاد... مابانت سعاد
كنت احسب ان آذانها تستمعني
ياشعور في صدري ماعاد الك مقعاد
اليا اعتقك بوحي __ عساك تعتقني
وين انت.. يااقرب لي من السين للصاد
في وقت احبه لين دار .. وْفجعني !
يا فرصتن راحت ولا آظن تنعاد ؟
خذها القدر في كفّه اللي صفعني
يااجمل من الصدفات من دون ميعاد
قبلك .. مااعرف الحبّ وش كان يعني
ياالذّ من ميً بعد قيض واجهاد
جاني قبل عزمي يطيح ورفعني
لو تنزلين وينزل المزن فبلاد
أزهر .. وقال ان مشيك اللي زرعني
قلبي خلق داخل قفص صدر وانقاد
ولو ان لعيوني قفص ؟ ما منعني !
عن حبك اللي في حناياي يزداد
والعاذل الشامت عنه ماردعني
لو شافك الملعون فرعون الاوتاد
قال انت الآهي .. وانت منهو صنعني
خلا فراعينه ركوعً وسجّاد
من تحت حسنك طوع ماقال طعني
لو كان لي قبل اعرفك يوم ميلاد
مافيه يومً قبل اعرفك نفعني
شعري يجود بوصف غيرك ولاجاد
في وصفك .. اللي للقصايد دفعني .