افرض ضرايب ع الكلام.. وعلى السكوت
أصل الكلام محتاج غذا.. والسكتة.. موت
وافرض ضرايب ع اللي مات ازاي يموت؟
الموت دا مش محتاج كفن، وصوان، وصوت؟
وافرض ضرايب ع اللي صوت ع اللي مات
لو صوته راح محتاج علاج.. ومسكنات
وافرض ضرايب ع اللي بتخلف ذكور
وافرض ضرايب ع اللي بتخلف بنات
أصل الولد محتاج له شقة.. عشان يعيش
والبنت دي محتاجة مطبخ.. فوقه نيش
وافرض ضرايب ع اللي عاش؛ ازاي يعيش
هو احنا ناقصين زخنقة.. وتموين وعيش؟
وافرض ضرايب ع اللي يتنفس شهيق
وعلى اللي يضحك.. واللي يتكلم بضيق
وعلى العيال اللي بتلعب حمرقة
كيلوا بامية ليه؟ ما كفاية نص وشوف بقى
وعلى اللي يشتم فيك.. ويدعي ربنا
وعلى اللي عاوز.. بس خايف مننا
وافرض على اللي شعره طال ما بيحلقوش
وافرض على الأصلع كمان وما ترحموش
وافرض على الست التخينة.. فوق اللزوووم
وعلى اللي عاملة رجيم وشافطة الدهن كوووم
وافرض على اللي يقول نكت لوكان برئ
وعلى اللي بيغازل مراته، وقصده شيئ
افرض على المرضى.. كفايانا مرض
افرض وادي دقني اذا حد اعترض