يا زهور عهد الهوى طلي اجا نيسان
و جيبي خيالو معك هالقلب مشتاقو
عطشان صرلي عمر دايب من التحنان
مظلوم قلبي البري للحب ما داقو
كانت صغيره و أنا عشقي بعد ما كان
يدبدب ع أرض الهوى و يزحف على ساقو
و صرنا سوى نكبر و بعالم النسيان
كلمن ترك ذكرى تا يربح سباقو
و بعيد صرت بصمت اسقي زماني الكان
ذكرى دفنتا بقلب مشدود بوثاقو
كانت عليي بسهر مجبول بالكتمان
تلفي تانصبح سوى للحب سراقو
و ضاقت عيون النجم و القمر شو غيران
يخسف جبينو أسى هالخمر ما داقو
و ما بين كرم الصدر و كروم هالبستان
ياما عيون الغزل ع حبنا فاقو
تهرب لعندي حفا و يشهق ورد غفيان
يفرفد زرارو شغف و ينتّف وراقو
و تراب يكرج كرج تا يبوّس الفستان
و يمد ايدو العشب و يطول عناقو
و يوصل لعندي معك شوق وقلب جوعان
و نهدات ترفع صدر سبحان خلاقو
وضمك بلهفه و سوى نغني الغزل ألحان
نعلّم حروف العشق بالتم يتلاقو
و اليوم بدي بعد ما اهجر النسيان
عاتب ع كتف المسا قلبي و أشواقو
مهما عليي بهجر تقسي الك غفران
و القط مهما انجرح بيحب خناقو