ناس من بلدنا هناك اهم

ناس من بلدنا هناك اهم

روح يا ابراهيم انده لهم

نفس العيون نفس الملامح في الوشوش

وازاي بقى يعدوا علينا ما يسألوش

يا عمنا.. يابن الحبايب..

ياللي أهلك.. أهلنا

اغلط وحود عندنا..

دا احنا قرايب

حتى شوف الدم في عروقك

بيشبه دمنا

واللا خلاص

الدم ما عادلوش تمن

ولا يتعملوش اي واجب؟؟؟؟؟؟

قرب هنا..

فكرنا بالعمر الحبيب اللي تسرق من عمرنا

يا ألف أهلا ويّا ألفين مرحبا

يا ريحة الناس الجميلة والقوب الطيبة

فاكرين ليلي المندرة

والضحكة فارده صدقها فوق الوشوش متغندرة

والنسمة في انصاص الليالي سحرها يشفي القلوب مهما جرى

هاتوا الدفاتر تتقرا

واقرا عليهم يا ابراهيم.. يمكن تعود الذاكرة

ويعود لنا طعم الصفا

واللمبة من نورهم تنور

والهوى ينعش حيطان المندرة