طوبى للغرباء

طوبى للغرباء

عشان احنا ف زمن تايه

ومقطوع النسب واهبل.. ومش معقول

نلاقي روحنا في توهة.

وزحمة فيها ناس أغراب

ساعات نلقى اللي يترحم على القاتل.. ويتريق على المقتول

وناس تشتم.. وتلعن في اللي ينصحها.. تقول كدااااب

وتمدح في اللي يخدعها بكلام معسول

وهو بيسرق المسجد..

ومستكتر عليهم يلبسوا القبقاب

وتهتف للي قال مرة: مافيش باشا.. ولا ألقاب

وتطلقها بدون معنى على حَصُّول.. وع البواب

خلاصة القول..

اذا الدنيا.. بعوالمها.. ومفاهيمها.. ومدارسها..

... وجوامعها.. وكنايسها.. ومشايخها.. وقساوسها..

قالولهم يوم:.. مااااا فيش عنقااااء.. ولا فيييه غول

يخافوا من عدم خوفهم.. ويتسابقوا ف مخاوفهم.

وألف يمين.. بدون ما حد حلفهم

بإن عنيهم اللي ف يوم ياكلها الدود.. وتبقى تراب

شافت ياما عنين الغووول!!

وابن الغووول!!.. وبنت الغوووول!!

عشان نفضل كدا على طول

قطيييع ماشي ف زمن تايه

ومقطوع النسب.. واهبل

ومش معقول

ونلقى روحنا فيه أغراب