بقالها فترة زعلانة

بقالها فترة زعلانة.

وهس اسكت.

وما بتنطقش.

فقلت ف بالي:. انا مالي.

يا رب يكون سكوتها خير.

وبيني وبيني.. قلقاني الحكاية دي.

وخانقاني خطاوي الوقت في الساعة

برتم مثير.

ولا خطوة شاويش عنبر في ليل شتوي رذل..

... ورذالته ما تنطاقش

قصَرت الشر

واديت الكلام تصريح.

يروح في أجازة ما يرجعش.

وفنجان قهوة متحوِّج

عملته بإيدي على كيفي

عامل ريحة وجو خطير.

وزر اللاب ضغطت عليه

فتحت الفيس..

لقيت الدنيا مقلوبة..

.. وعاركة قايمة منصوبة..

.على واحد كتب كلمة في نص وهي مرفوعة

وهي حقها يعني

يكون إعرابها منصوبة

وده بغمزة..

ودي بلمزة

وده بشومة..

وده بطوبة

وده بيقول: خربتوا الشعر يا اخوانا

وضيّعتوا المعاني فيه

وده بينادي: فيييين سيبويه؟

دي وقعة سودة...

.. لو ضاعت لغتنا نضيع.

ومالنا بعدها قومة

ودا بيقول: يا رب ارحمنا م الشُّعرا

دي ناس فاضية.. وكلامها كتير

دماغها بجد ملسوعة، ومخرومة.

بلا فتح.. ومنصوبة.

بلا رفع.. ومضمومة.

يا خلق ياااا هووووه

خلاااااص أثيوبيا بنت السد

فوق راسنا.

وبدأوا يا ناس خلاااااص يملوووووه

وادي المفعول بقى فاعل..

وادي الفاعل كماااان كسرووووه

هنسقي الزرعة بالدمعة

ونتشاهد على الميِت يقول: امبوووه

يا عالم فوقوا.. هاتجنن

وآخر برج في دماغي خلاص هيطير.

وانا من صدمتي.. من شدة البلوة

سهيت.. وانسيت..

وضاعت لذة القهوة..

بدون تفكير

لقيتها..

.. واقفة باصة لي.. مرقباني

وبتقول لي على سهوة

بضحكة حلوة.. عارفها

مساء الخيييييير

نسيت القهوة يا باشا؟..

تحب اغليها لك تاني؟!!

وصوت الوقت عاد فجأة

على الساعة.. برتم مثير.

ولا خطوة شاويش عنبر..

.. في ليل شتوي رذل..

ورذالته ما تنطاقش

وراح مني الكلام هربان..

وسابني ف صمتي ما بنطقش

دا بتقول لي.. مساااااااء الخييير!!!

وهيَّ اللي

بقالها فترة زعلانة.!!

وهس اسكت.!!

وما بتنطقش.!!

يا رب الضحكة دي.. تبقى.. وراها خير.

مساء الخييييير