وعايزك قبل ما تجيني... بلااااااش ألواااان
ولااااا أزرق.. ولاااااا أحمر
عشان اللون بيتغيّر
وبيغيّر ملامحنا
يخلينا كما الأشباح
هياكل ماشية في الشارع بدون أرواح
لأن اللون مدارينا
مخبي الضحكة في عنينا.. ورا الألوان
بلااااش ألوااااان
عيونك حلوة من غير كحل
رموشها تذبح الفارس.. كأحسن سيف
وليه ما عرفش
بتداري الجمال فيها بصبغة زيف؟!
وشعرك ليل
بيتمرجح مع النسمة في فصل الصيف
وليه ما اعرفش بتقصيه؟!!
وبتخليه كما عاشق ضناه الخوف؟!!
ولملم نفسه في نفسه.. وأصبح طيف
وانا شاعر
وبالإحساس أبيع عمري... وأنا الكسبان
بلااااش ألواااان
أنا عايزك
ومش عايزك تكوني غير ما انا عايزك
أنا عايزك تكوني فكرة جّوايا.. ولو بجنان
تشديني بقيمتك مش بألوانك
أنا عاشق جمال الروح بدون ألوان
أنا انسان
ما حبتكيش في يوم أبدا لفستانك
انا عايزك تكوني انتِ
أغيب.. وارجع.. ألاقيكي.. أصيلة.. زيّ ما كنتِ
هتبقي دنيتي وعمري
وقلبي.. وفرحتي.. وفكري
ساعتها.. هتبقي يا حبيبتي
حبيبتي.. وتسكني الوجدان
بلاااااش ألواااان
بلاااااش أوهااااام
أنا عايزك بلون واحد
بلون ثابت ما يتغيّر
عشان قلبي ما يتغيّر مع الأيام
تعالي زي ما انا عارفك
وشايفك سر ما في الدنيا من إتقان
تعالي نزرع الأحلام
على شط النجوم.. نجري
ونتسابق ورا نسمة
تطير من شفتك بسمة
تلالي في السما نجمة.. من الفضة
تنورها بنور الحب... نسكنها
ونملاها.. صلاة من غير ما نتوضى
لأن الحب طهرنا.. وصفانا
وخلانا
نسينا طينة الإنسان
وعلانا على الدنيا وما فيها من الألوااان
بلااااااش ألوااان
بلاااااش ألواااان