احس روحي اعرفك صارلي سنين
گبل لا تحچي كلمة عيونك السود
بأول ابتسامة وسالفة وياي
احس بصدري شي ما چان موجود
أگول شبي گبل دگات ما بيه
چا غير انت گلبي الچان مفقود
انا ماريد غير بصدري اخليك
واذا تتفضل بضحكاتك اجود
واحبك ما اكلك من الاگيك
شلون احچيهه الك بلسان معگود
اتلعثم بطيفك من احاچيك
كلماتي شتظن يجمعن عود
انا مفتاح صدري انسان شفاف
يشبهك يل فتت من باب مسدود
يكشخة صفنتي من اتمر على البال
يبن حظني ومته الذاك الدفو تعود
ترف والمو ترف كلش ترف بيك
ملك بس بترافة روحك تقود
ولا مو ماي حته انگول شفاف
اترف والهوه يخدشهه الخدود
يل تحرسك سرايه من العصافير
ترة حقة الفراش ابابك جنود
يريحة رازقي منيجيسك الغيض
ومن تحمر وجنتك بالهوة تسود
ومنك تستمد عين الگمر نور
وتاخذ لونهه منشفاك الورود
يسالوفة ضوة وقصة مواويل
خايف لا تجيسك عين حاسود
وعرجة الابتسامة ابعدك اتصير
وتهل دموع عيني بحيل هادود
گبل لاشوف وجهك اشبه الناي
گصبه وحيلي من النوح مهدود
واجيت وجرح عمري الشيب الروح
بدة بنشوة وصالك يبتدي يهود
تلم فكرة غيابك عش الهموم
لا تلتفت عني وبالخلگ عود
احس برحمة الله وفضلة وياك
وبدونك چني من الرحمة مطرود