لعينك ماألوم الشعر لو يكسر من الاوزان
وقليله لو على ساطع جبينك قبّلك قافي
انا مشتاق اضمك ودي انسى بقربك الاحزان
ابدفى من حنانك وارتوي من نبعه الصافي
ابرجع لك هذاك اللي رضع من صدرك التحنان
طفل يومه وعى.. كفك غداله فرشه الدافي
ولا منه مرض نومك تجافى داخل الاعيان
لسانك يلتجي بصدق الدعا للواحد الشافي
وانا رغم الثلاثين المريرة.. والفكر حيران
لعينك بس جيت اركض رميت العالم خلافي
يااروع بسمه تنور حياتي بأجمل الالوان
تجسد كل معنى للسعاده.. من ثغر وافي
ياشجره مورقه طول الزمان ووافرة أغصان
ياطله مشرقه كالبرق وسط المزن ينشافي
فديتك عن همومك والسهر لاطاول الاجفان
لأني لااعتراك الباس.. كيف أكون متعافي؟
ياخطواتٍ عظيمه تحتها تزهر رياض جنان
أجل والله قليله لو ادوس الشوك لك حافي
انا مهما عطيت من المحال أوفّي الاحسان
جميلك كالجبل.. لو بحمله يعجّز اكتافي
ولو ان العمر بشرى لك شريت بغالي الاثمان
عمر مابه حزن فيه السعاده فرش ولحافي
غلاكِ عن غلا غيرك رجح في كفة الميزان
ويكفيني رضاكِ لو جميع الخلق لي جافي
لأن رضاك هو أهدى سبيل ل جنة الرضوان
وغضبكِ يعجل الله العقوبه فيه.. ياكافي
بعد عيني عسى عيني بعدكِ ماتشوف انسان
وعسى دنيا بدون أمي محل يسفابها السافي