سبع ساعات أسولف وأتكلم وأستخف دمي
وهي تسمعني وتضحك ومبسوطه على الآخر
سبع ساعات أعلمها عن أحزاني وعن همي
وأسولف عن حكاية طفل كان وصار هالشاعر
سبع ساعات تتساقط حروف الصدق من فمي
على صحرا مسامعها سحاب العشق متناثر
سبع ساعات وتحلف لي براس العشق وتسمي
تقول أنت الوحيد اللي ملكني حبك الساحر
سبع ساعات ونادتني بأسمه ماهو بأسمي
تناديني ( فهد ) وأسمي أنا يا للأسف جابر
تشنج كل شي ٍ كان حولي ومسمعي يدمي
ركز خنجر ( فهد ) في مسمعي من صوتها الخادر
تخدر فكري وجسمي وذاب أبداخلي عظمي
وصرت أسمع صدى صوت ٍ يردد غلطة الشاطر
يردد غلطة الشاطر بعشره واقعي وحلمي
وترددها زوايا غرفتي والواقع الغادر
كثير أصوات شقت جلدي اللي يحتظن لحمي
صراخ الباب والدولاب والشباك والساتر
وونات القلم والدفتر اللي يلتفت يمي
وخايف وش أبي أكتب بوسطه من هنا لباكر
وكانت ساكته وصوت النفس من خشمها وخشمي
ربع ساعه وببحت صوت قالت خير وش صاير
وطرى في بالي عبدالله وخالد وأحمد ونشمي
ولآخره ( وفهد ) تسعه وأنا مدموغها العاشر
وقلت أبدن ماغير الخير ولكن أمسحي رقمي
أكيد أنه ( فهد ) جالس سبع ساعات وهو ناطر
وقالت لي : رجاءًا أو أقولك طير ياعمي
مسوي حضرتك في هالزمان العاشق الطاهر
وقالت لي : أقول وقلت أنا بقول وذا علمي
عجب للناس وش هالناس تخطي وبالخطا تكابر
أنا يابنت بنثر لك حياتي وأجمعي ولمي
بعضها بنثره في مسمعك هالحين ومن خاطر
ترى عمري أنا تسعه وعشرين وكذا رسمي
ولكن عشت أيامي دبلها مقبل وعابر
أصيل وكل أصيل ٍ مايبي مدحي ولاذمي
وسبع أنعام في هالناس أخص الحامد الشاكر
أنا من نجد وربعي هم عتيبه وخالي الدحمي
وبرقا لحمي ودمي وأنا من روق ومع ناصر
أنا جابر ولد هايف وسلم الطيب هو سلمي
أبوي اللي مربيني على الجزلات وأتفاخر
أنا راعي مجاهيم ٍ يشع بفخذها وسمي
وراعي خيل وراعي بير وبيت مبغضه كافر
على الرمضا حفت رجلي بأرض ٍ عاشقه ضمي
وشمس ٍ تشرق وتوقف على راسي وأنا صابر
عرق وجهي يصبّ وأمسحه بشماغي وكمي
وألد عيوني عن ناس ٍ سرقني يمها الناظر
وأنا شاعر ولو أكتب عجز كل فكر في نظمي
ولاني بالغرور أحكي ولكن واثق وقادر
وأنا رجال هاوي للقمم ويقودني عزمي
وأبي أرقا على راس الجبل وأنتي مع الحادر
عرفتي ليه أنا طاهر لأنك همي وغمي
ولأن الدنيا في عيني جبل نرقاه ونغامر
يابنت الناس شفتي كيف بليا سلاح مانرمي
ولانوقف بوجه البندق المليان ونخاطر
خلقنا الله بشر بعقول وذا واقع وذا وهمي
وكل ٍ يتبع مراده وفينا رابح وخاسر
وقالت لي فمان الله شعلت النار في جسمي
فمان الله يالطاهر ومثلك قله ونادر
ورحت آخذ كتاب الله وأحلف بالكتاب أمي
لو أن أسمي ( فهد ) بالله ماكان أحلا من ( جابر )