أنا ماني نبي أو ماأرتكبت الحرام
ولاني إنسان كافر أو بالدين ميح
أنا مسلم وحالي حالكم بالتمام
يمكن الفرق إني بكل وقاحه صريح
يعني ماأغضب الله وأرضي أهل الملام
دام ربي غضب طز بالبشر تستريح
أكره الأزدواجيه بمعنى إنفصام
صعبه أكون فاسد والتقيّ النصيح
ماأتصنع طبع ولا أرتّب كلام
ولا أتميلح وأنا مخلوق أصلا ً مليح
نفسي لو ماأحترمها غصب ليّ أحترام
أحترامي بذمي وأنا أعتبره مديح
لأنكم ماتركتوني وقلتوا سلام
صرت أنا القافله وخلفي سمعت النبيح
اللي وجهه من أذنوبه سواد وظلام
لايلوم المرآيه إن شاف شكله قبيح
كونوا قد اللئامه لو تكونوا لئام
لاتقولوا محمد قال وأنتم مسيح
لو تدري بكل أفعالكم الأنام
ماأرتكبتوا خطا ولا أجتنبتوا الصحيح
وكنتوا أهل الأدب والدين والألتزام
ومن مهدكم بستر وخير إلين الضريح
بس لو أمطرت بالغيث وبل الغمام
مانبت في كفوف الصّمد حنطه وشيح
والصراحه تشابه دوم ضرب الحسام
وأنا لهالسبب بس عاذر اللي يصيح
وأنا ماجيت أبنصح أو أصحي نيام
أنا لو هو بكيفي في جهنم تطيح
دام هذا مقامي يكفي هذا المقام
ولا أظن أخّسره وأنا لساني فصيح