الشعر فكره نبضها من داخلك تستحضره
وبقدّ ماتقدر تحاول كل ذوق تلامسه
إيه الشعر جوع وفقر ولا حكاية مقبره
إيه الشعر في شاعره يشعل فتيلة هاجسه
إيه الشعر نار وعذاب وليل مؤلم تسهره
إيه الشعر كل إحتياج ٍ في ضلوعك حابسه
إيه الشعر اللي قصيدك يرتجل في منبره
إيه الشعر حرف ٍ على لاهب لسانك حامسه
إيه الشعر إيه الشعر ماكل شاعر يقدره
إيه الشعر ماهو شعر كان المشاعر يابسه
ماهو شعر هذا الشعر بأتفه شعور ٍ تشعره
ماهو شعر أن تمتطي كرسي وتصبح فارسه
ماهو شعر اللي عشانه تصير شاعر مصخره
ماهو شعر اللي جماهيره مراهق وآنسه
ماهو شعر اللي تقول ولاأنت فاهم أكثره
ماهو شعر جمع الكلام وفي بعضه أتعافسه
ماهو شعر لو ما العنيد من القوافي تصخره
ماهو شعر إنك تعيد الثالثه بالسادسه
ماهو شعر شعر بحبيب الأمس تهجي وتحقره
ماهو شعر مدح اللي مايستاهل أحد يخامسه
ماهو شعر اللي تبيعه بكل حفل ٍ وجمهره
ماهو شعر اللي رفع قدرك عن اللي تجالسه
ماهو شعر اللي على كل حبل لازم تنشره
ماهو شعر به تنشهّر من كل كلب تباوسه
ماهو شعر بيت ٍ صحيح وبيت ثاني تكسره
ماهو شعر وزن الخليل ولادخل مدارسه
أنا اللي تلهمني وأغني طرقي وقافي مره
سلم على أستاذ الخليل وشرحه ماني دارسه
ماهي مره إلا عظيمه كيف مثلي تأسره
ولا أنخلق اللي يرد العرش لي وتنافسه
البارحه بعد أجتياح الذنب صدر المغفره
وقفّ على منديلها كاس ٍ عطش له تارسه
حاولت أنساها وأنسى كل شي ولاأذكره
لكن سكرت وشفتها في وسط كاسي جالسه
حقي على نفسي كبير ولجلها قلت أخسره
وش فايدة حقي على نفسي وحظي طامسه
ياهوه وأورام النخاع أما نسيت بتحفره
يعني بيذبحني مرض موتي بمخي غارسه
على بلاط البارحه كانت وجيه مبعثره
عرفتها وأنا اللي بنسى في جنون أمارسه
حتى الغريق أشوف له وجه ٍ يشابه لبحره
ولانسيته لو تموت بداخلي نوارسه
لملمتها بعد ماطاح اللي سرح على ظهره
حتى تعوذ من رجيم أقذر مكان وخانسه
كله سرح بعيونها وهي جالسه تستنظره
اللي ذبحت يوم اللقا مع من تحبه حارسه
إيه أذبحت ولا أنكسر خفوقها وهي تنحره
وتمسح يديها في كفن مقتولها اللي لابسه
يسعد لي جرحك يالوريد بنزف دم ٍ تنثره
على جفون الليل وتدمع بك عيون ٍ ناعسه
يالبارحه كم بارحه فالبارحه متنكره
بأربع جهات ألقى عذابي وأنتي صرتي خامسه