يا نسيم الليل بلّغها السلام
يا نسيم الشوق تكفى قِلَّها
قِلَّها مشتاق وفي قلبي كلام
ولا كتبت حروف شعري إلا لها
أكتم شعوري وأقول إنّي تمام
ويشهد الله مبتلش في حبها
في ديار الورد قلبي مُستهام
في هوى اللي الورد يكسي خدها
اللي طيوفه داخل عيوني تنام
لا سلاها خاطري ولا ملَّها
أكحل العينين ممشوق القوام
كل عينٍ شافته يا حظها
فارقه بالزين عن كل الأنام
حظ من يدَّه تلامس يدَّها
اللي سناها مثل برقٍ في ظلام
طاغيه في الحسن.. الله ربها
ساكنه قلبي.. عليَّه بالحرام
وله محبه زايده عن حدها
في سما حبه تعديت الهيام
هي سبب كل الجروح وطبها
من بعيني شافها كف الملام
يوم قلبي بالمحبة ضمها
فاتنة والموت من تحت اللثام
تسحر العالم ببسمة ثغرها
مثل نورٍ يضوي بوسط الزحام
وقد كساها الزين ربي كلها
ما قويت البعد واتعبني الغرام
ولا تهيأ القرب.. هيَّا حِلَّها