يا بحر صوت موجك حرّك الشوق فيني
وايقظ إحساس ساكن ضاق فيه الصدر
يوم انا شفت زوله مرّ من بين إيديني
تَلّ قلبي بنظره كنّ فيها سحر
مرّ واشّر برمشه ونظرته تحتريني
جيته بوجد قلبي قلت تكفى انتظر
قال نظرات عينك كنّها تحتويني
قلت تكفى انتبه لي يا شبيه القمر
قال وش تعتبرني قلت روحي وعيني
قلت وينه مكاني قال كلك نظر
قلت انا هاك قلبي إليَدك من يديني
قال فدوتك عيني.. إنت تآمر أمر
قلت أنا في انتظارك كان ودك تجيني
قال كنت أنتظرها.. معك يحلى السمر
قلت لك كل عمري وعد بينك وبيني
قال أنا مثل غيمه وانت وابل مطر
قلت قلبي صفالك والقلق يعتريني
قال ماني لغيرك لا يصيبك كدر
وبعد عشرة طويلة كانت أجمل سنيني
فرقتنا الليالي وكل حلم اندثر
واندفن حلم عمري والقدر يبتليني
والزمان إيْتقلَّب بين حلوٍ ومرّ
وصارت ايام ذكرى وانكتب في جبيني
"الغلا ما هو نصيبك.. ما لك الا الصبر"