يسعد مساءك يا غلاي اشتقت ومرّيتك اسلّم
ساقني قلبي ولولا وحشتك ما كان جيتك
آه لو تدري بحبك.. كم فؤادي فيك يحلم
كم سهرت الليل لجلك.. كم تعنّيت وسريتك
إنشدي عني النجوم وجرح في الخفّاق عَلّم
إنشدي عيني وليلٍ طال بي فيه احتريتك
في غيابك كم تعب قلبي.. عشانك كم تألم
ما شغل فكري سواك ويشهد الله ما سليتك
مسكنك عيني وقلبٍ من عَنا حبك تثَلّم
اقلطي بين الضلوع الناحلة والبيت بيتك
يا سقى الله يوم مريتي مع اللبس المقَلّم
نظرة عيونك في عيني صابت القلب وهويتك
انعقد من حسنك ونظراتك لساني وبَلّم
وانتزعتي الخفّاق قبلِ لا اقول لك عطيتك
انتبه سمعي لصوتك.. وش تبي مني تكلّم
قلت سبحان الذي سوّاك يالغالي فديتك
الحسن من يوم شافك كم شكى منْك وتظَلّم
من عيون الحاسدين وشرّها يا كم رقيتك
لا دعاك الحب والأشواق لا تبطي وتوَلّم
وإقبِل على قلبٍ يودّك.. لا تعَذَّر لا دعيتك
كان ما تعرف سلوم الحب انشدني وتعَلّم
اسقني عذب الهوى يا منيتي دامي سقيتك