يامُلهمي كانك عن الدرب صديت
القلب الاخضر تشعله نظرة اعجاب
وكانك معزم في خطاويك واقفيت
بأطويك صفحه وافتح لبعدك ابواب
كيفي قصيد ومنْه ياما تقهويت
اجيه وألقى من حلاياه ترحاب
وكانك لقيت الغير وللغير وليت
كني اشوفك جالب لموتك اسباب
عليت قدرك لكن انك ترديت
بين النجوم وجالك الشين جلاب
خلك على ما انته وانا اللي تغنيت
صحيح مزيونن وللعين جذاب
وانك بنيت بداخل القلب لك بيت
وحتى كرات الدم ترخصلك ارقاب
لكني بالنسيان شفني تحليت
وغردلي العصفور وتنبحلك كلاب
ولا جيتني يازين في كف عفريت
ولاهي علاقة فاس ويدين حطاب
اصبحت في قربك وفي بعدك امسيت
ويالعن ابو صبحن يغطيه كذاب
لاشك ما انت اللي لقلبي تمنيت
والصقر ما يتبدل اليوم بغراب
وكانك لقلبي يا ادعج العين حنيت
صفحتك راحت وابتدا بغيرك كتاب
كني على لكزس وكنك بوانيت
يعني على ما قيل ماني بمرتاب
دوم آتغنى واردف البيت بالبيت
وان جت على حبك ترى خاطري طاب