عشان يعني مَ بنحبَك
تقومْ تِعْمل كِدَه فينا
بتدَّلل وبتعاند ومالو
برضو فِ عنينا
سَكَنْت ف قَلبي من جُوَّه
ومِسْتَكْتر تكون لينا
ياخوفي لو صحيح قَلبك
ح يجي فْ مرَّة ناسينا
ساعتها الدنيا مش دنيا
حَ تبقىَ نار بِتكْوينا
وليل العتمة حَ يغيِّم
وزهر الحب يبكينا
وشوف بالرغم من كله
حَ تبقى برضو غالينا
ولا يهمك وإيه يعني
حنقدر ننسى مَآَسينا
وبعد ماننسى نستنى
يجوز تيجي نواحينا
تحس ف مرة بعذابنا
وتتعطَّف وترضينا
رضانا نرجَّع ايامنا
لسابق عهدها لينا
ونزرع ورد وجناين
ونِدِّي للي ح يجينا
ونكتب عهد مابينا
ماتتفارق أيادينا
وتتلاقى القلوب دايماً
على اللي بس يحيينا
فداك روحي ياروح روحي
أنا مستني ح تْجِيِنَا؟