أنا باحبِك
بس خايف أخدعِك
وازاي أعيش
طول مانا ف دنيا الخداع
خايف أضمِك
والقى نفسي بودعِك
ولمين ح اعيش
طول مانا ف لحظة وداع
مش ح احبِك
والقى نفسي باخدعِك
مش ح اضمِك
والقى نفسي بودعِك
لازم أشوف حل لحكايتي
لازم يكون قلبي معِك
أشتاق لقولِك واسمعِك
انا لما بالمح نور بهاكي
باصرخ واقول ما أبدعِك
أنا لايمكن ح اخدعِك
ولا حتى لحظة ح اودعِك
دلوقتي جي لك ياحياتي
ياكل عمري ما أروعِك
بَوْهِب حياتي كلها
دلوقتي ليكي
واعشق جمال الورد كله
من عنيكي
واسرح واتوه في جنه حلوه
بتناديكي
واكون معاكي ف كل مطرح
ح اكون معاكي وبين إيديكي
واسمع لغنوة حب منِك
يسمعها قلبي ويلاغيكي
ح اكتب واقول عنِّك حكاوي
ماهو أصل كل الحب فيكي
لازم اخلى الناس تتعلم
معنى الحب اللي انا حبيته
واحكي واقول للناس واتكلم
ع اللي فقلبي وع اللي هويته
ع اللي ملالي حياتي محبه
ع اللي فرشلي الورد ف بيته
ع اللي أخدني لحضنه وقلبه
ع اللي ادَّاني واللي ادِّيته
ع اللي هداني حنانه وعطفه
ع اللي بحبي وروحي هديته