يا قلبي الحرائقك ما طفت هبوده
كل ما تطرى ناس ليلى الرحل عبوده
نارك ولعت بنزين وقام كبوده
حار فرق الشتيله الريه ماها أم بوده
عوضك قلبك اطلالها ومحل مرقوده
راحت بت ملوك آسيا الجميله عقوده
صافيه بتناصح الجار وماها حقوده
عوضك تبكي لامن ود مقنع إقوده
قوامها مثالي ما لاقاني ارق من عوده
قومته قاسيه كان قامت يقاسي قعوده
شهيق وزفير ونزلات النهود وصعوده
واا تعب البشوفهن ووجعتو الموعوده
ما قطعت عباده ولا سِهت في سجوده
خجولةً كان معاها ولا بتحس بوجوده
سليلة ملكه من آسيا واصاله جوده
كريمةً طبعه بتحكّي الغريب بجوده
ماها شليقه حِسها مو لميض في ردوده
سمحه وطيبه راقيه وهيبه حاليه ودوده
ان قلته الطبع ما بتلقى هسي ندوده
وان قلته الجمال أيه ألاله في خدوده
بيني وبينه ما نقضت يمين معهوده
شان خاطر سعادتي بتبذل مجهوده
دمار الدنيا من عاده وثموده وهوده
يبقى عليك وكت تقدل تهز بنهوده
يا ليلى السنين طالن علينا عدوده
ولسه ولسه بياناتنا الطرق مسدوده
يا طينة الجمال آية النبي المنشوده
عندي معاك غرام ومحبه ما محدوده
النبي قال تزوجوا كل راقيه ولوده
بت حسباً منسّله بالاصاله بلوده
انتي يا ليلى نعمت ربي ماها خلوده
نِعمه حقيقه ماها المذنبه ومجلوده
أنا واياك وفردوسنا الوضعنا اوتاده
كانت جنه بس طاري الايام ما قاده
ليلى وطيبتها وطبع النفور وعناده
كانت مُنيه لكن جاء الزمان وأباده
عاشقك في نهايتو الناس هديتك بِبدو
الشوق والعذاب والقيح دا سمم كبدو
الشيب ليلى عمم في المفاهم ربدو
والحب سمّ خاطرو والله إرحم عبدو
الجدّي البقابلك وبمشي فيك متاني
هو الحال العذاب وجعاً قديم ما ختاني
يا السمراء النحيله وخاشه في الكتاني
قيس داك مات وعبدو قيس التاني
جروحك ليلى تنزف ولسه م داويتها
والنجمه المع فجر العباد خاويتها
حالك ليلى تصعب وحالتي م قاويتها
حال قيسك زمان الليله أنا ساويتها
ّزمان قيسك فقد دربو وطحاك بالصي
ّبيدافر بالهويد قدمو البشيلو حصي
ّأنا مجنون غرامك وقلبي مسمي عصي
ّمضروب بسهامك ومُسمِع الناس صي
طيفك خلى احلامي ورجع كابوسه
قمره وقلبت الجورين وانار فانوسه
ليلى روائع الشعر والبيوت وجروسه
فرقها للملاك ظل شخصها ومحسوسه
ريق نحلا تضوق وتشتهي المعسول
لهيجك ليلى فاق المن نحل منسول
فرحتي بيك وبحب خاطرك المغسول
فرحة آمنه الممجدة في بطنها رسول
الليل فيهو وِحشاتو البقاتلن روحهن
خلهن الخدر جنبك مراقدات سوحهن
لا توجهبهن وادي الدرك بوضوحهن
الليل فيهو طوفان خليك قريب يا نوحهن
ظبياتن صغار عمر الزهور يا مؤنس
جميلاتن سُماح طعم اللهيج بقدونس
جفلن مني وأبحرن بالخليج لتونس
وأنا صادفني حوتاً كان موالف يونس
ابيات شعري بترتيب قوافي حروفهن
ما قضن غرض طغى منكرن معروفهن
بنيات ثانوي جن مارات سمعته خفوفهن
أنا عميان يا يوسف قميصك اشوفهن
يا ليلى الوجع أصبح عليّ كيمان
حليلي يا حليل المحلق كتر الهيمان
أنا وياهو في وصالك تقول تيمان
يا رب آيه منك وربح النبي سليمان
بيني وبينك أبداً ما اتخذت زعيل
ولا اتخالط كلامنا وجاب هوى وتنعيل
وجعاً ضقتو ما لقيت ليهُ صاحباً إعيل
ولا لقيت ليا كبشاً افكك ااا إسماعيل
يا بكرة مفاسِح قيلي شرق الفوده
من وين ليا بالقوه البقت مفقوده ؟
بيرك صفحة البادية المراقدة عقوده
دعواك ربي ليمها وتكمل المعدودة