برقا لاح وفرتق للدكوم عتماهن

برقا لاح وفرتق للدكوم عتماهن

ودّر غمده أمياقي المنام جافاهن

القمري السجع شابك الغصون ضلاهن

جدّد فيّ جروحاً والعروق سماهن

بشوف شلعيها قايم والسحاب عماهن

وآبلاً صبّى فوق ضهر السراب.. قتاهن

قشوشا خدرت وديّانا دق المطر رواهن

جاب لي خاطري اللام الدهر واراهن

بِرزم ضحوى ناقع في الرتوع كساهن

عُقب تالانا ضهري ورقّع الفطّاهن

العِشوي السكل نص البيوت هداهن

خلف فينا جو نما قصد تلاهن

كيف إتحاله جوك يا خريفنا بلاهن

بتتقريف نفوسنا يوم إغيبنا هواهن

طيبك وطيب دعاشك وطيب غلاهن

طمانينه قلوبنا ولي جروحنا دواهن

جبل الحديد وبريقاتو القبيل رفاهن

طراني الحشيم شهواتُ جت عفّاهن

بعد اتراقص البراق نفض السحب زفاهن

عاني الملزاتو بي حشم الرسل طفاهن

سفل منّا غادي ووديان البلد قفّاهن

جابلو نسيم وجابلو هبيب عُقب دفاهن

دلّى رِسينو في بيوت ام سماح حفاهن

وصبّى صبيبو عشره سنين بخار تفاهن

انبسطوا العرب غلّق حفيرو محاهن

التُرع القبيل نشفانه عبّي ملاهن

انبسطو البنات وام سماحه معاهن

دا العانيهو يا الهطّال لقيتو رضاهن

تتخاوج جُهال مويه المطر بالاهن

تتساكك تفلس في الطمي الحلاهن

بنيات ريف ضربن صقيعو خلاهن

فردوس الجنان حورا هناك في علاهن

براريباً عسلهن بتقطِر من فاهن

هزاريفاً لمح شاعر قصيد غناهن

جوّد حرفو بي اروع اسم سماهن

وقدّه سعينو خائف من اكتلو ظمأهن

شتيلاتا غفرهن من زياره حماهن

اكجر وكل يوم بتشكل هو وماهن

رب البيت وغفرو المن بشر لمّاهن

وربك ذاتو من شوفت حرامو عماهن

قواماً احير الشافو ورديف لتّاهن

جيدٍ والخصر ربك براو مغّاهن

تقياتاً سيفهن م بتلقى وراهن

عفيفاتاً تقول اخر الرسل ربّاهن

ربك غايتو من فاحشه وفساد نقّاهن

وعدّل خطوتهن من شر العباد وقّاهن

شبه شتيلات الجرف الطمح.. سقّاهن

زهور فجر الربيع شتلات جنان بقّاهن

رب البيت وغفرو المن بشر خبّاهن

شتيلات فُرهُد الضرب النسيم هبّاهن

ربك غايتو بي تقوى وجمال عبّاهن

بالليل والنهار تسمع خطر نبّاهن

صبّي صبيبو وابلأ مرتكز سرّاهن

وتوّر زرعو نجّاض أخّدر غرّاهن

على أمات مسايراً بالسراب كارّاهن

عّقب إتندلت عفراتو والبروق فرّاهن

ناوي الليله اكمل الكان مسورو بداهن

وحلّب سحبو عتّم في الليالي مداهن

كل م اقولو ويحك دا تجيبلي رداهن

بقول لي لا بس باسط خريفي فداهن

شافلو بروق بتتخاطف صعيد ناداهن

قربن منو هبّى النسيم صدّاهن

في بلد ام محالباً من دفاق سادّاهن

صبّى صبيبو شرّط سُحبُ جت قدّاهن

فداكن صبحي مطرو والخريف ولداهن

فداكن ارضي خصبه والطيور وشداهن

فداكن باديه بي قيزانه وتروسي حداهن

فداكن ابل الشوف والنظر مو مداهن