عندك كوم جمائل وللمكارم جامعه
عندك قلب بِحِن وجوز خدودك لامعه
يا العينيّ عليك من المخاوف دامعه
ليّ فؤاد بِصرِّخ وليك آذاناً سامعه
ليك أحرف غُناي ومرتبات قافياتهن
يا العندك بقيف سقف الغُنى وغاياتهن
جمالك يا ملكة أشعاري وحروف أبياتهن
مِمسّخ لبنات جيلك مساخة حياتهن
عينيك دوحه أفراحي وملاذي الدافي
يا الليك من المحاسن عندي قدراً وافي
بغني عليك إلا يا ست السماح عوافي
قاصر حرفي لوصفك بكون غير كافي
خدك نادِ وجنك يا أم سماحه آذاني
عينيك راحه عينيّ ليكي حامله اماني
قلبك غطّى نقصي وفي دواخلي ملاني
يا أملي الكبير وملاذي من احزان
انتي ملاك ويعجز عن صفاتو لساني
يا سمح الصفات يا روعتي ويا أماني
ليك الحب بكِنّو ومن سواكي عماني
مغرم وطِيب فؤادك في هواكي رماني
برويك في قصائدي وفي روائع فنٌِي
بدرر الحديث قافيات تعبّر عني
تشوفي غرامي ليكِ وكل كلامي كأني
مخلوق شان هواك يا ستي غصباً عني
وقفت من الكتابه ومن شعر دوبيتي
لمن جيتي يا ست الهوى وست بيتي
ما قلتيها لي كلمة بحبَك أبيتي
من عذب الكلام خجلانه ما اتغابيتي
عارف وجعتك عارف القديم الماضي
عارف الدنيا علمت فيك وحكمها ماضي
كان طالت الأيام والقسمه كانت قاضي
بتعيشي السعادة وبتحقق هناي ومرادي
نسأل ربنا وعالم السرائر الفيني
انو اللقاك أول تاني البجيني اجيني
يا ست الصبا ودوحة هواي ووتيني
دايرك جنّه دايرك مسكني ونص ديني