علمني سامح أعدائي الطعنوني

عَلِّمْني.. سَامِحْ أَعْدائي

الْ طَعْنُوني بْخَنْجَرْ مَسْمومْ

وْأفْلُشْ صَوْتَكْ عَ أَشْيائي

وْإِرْجَعْ مِتْلِ الْمارِدْ.. قُومْ

عَلِّمْني إِتْواضَعْ أَكْتَرْ

كنْتْ.. وْرَحْ إِبْقَى مْنِ تْرابْ

مِسْكينْ الْ عَ خَيُّو تْكَبَّرْ

مُشْ حاسِبْ لِلْمَوْتْ.. حْسَابْ

عَلِّمْني مَشِّي سَاعاتي

قُدّامي.. وِالْغَايِبْ شُوفْ

آخُد مِنَّكْ تِطْليعاتي

وْمِتْلَكْ، خَلْفِ الْواقِعْ طُوفْ

عَلّمني.. إِصْدُقْ مَعْ نَفْسي

تا إِصْدُقْ مَعْ كُلّ النَّاسْ

يا عَلي.. وْعَ مْشارِفْ أَمْسي

عَلِّقْلي فَجْري نِبْراس

ضايِعْ وَحْدي، وْبَدّي إِحْكِي

تِعْبان مْنِ وْجُودي وْجُودْ

بِتْذَكَّرْ شُو صَابَكْ.. بِبْكي

السَّاعات الْ ما إِلْها حْدودْ

بِرْكُضْ عَ كِتْبَكْ.. إِقْريها

فَسِّرْها عَ ذَوْقي ، وْصيرْ

إِشْرَحْ لِلنَّاسِ مْعانيها

كِيفْ.. وْلَيْش.. مْرَقْت كْبيرْ؟

إِنْتَ الْغايِه وَحْدَكْ.. وَحْدَكْ

يا رْفيق الْعايِشْ مَقْهُورْ

فِكْرَكْ نُور مْشَرْقَطْ بَعْدَكْ

يا دِلّ الْما شافِ النُّورْ

خِدْني بْإِيدَكْ.. صَوْتي فَحَّمْ

يا أَميرِ الْمُؤْمِنينْ

يَللّي صَلَّى عْلَيْك وْسَلَّمْ

ما بْيِفْزَعْ مِنْ يَوْم الدِّين