لِمِّنْ شَمعْ جِسْمِكْ وِلِعْ
فِرح الرَّمل والشَّطّ
وِارْتَاحْ طَير البَطّ
وِالْمَوْجْ زَقَّفْ تَا شِبِعْ
وِتْعَمْشَق بْصدْرِكْ.. طِلِعْ
مِتل الزّغَار يْنِطّ
وْصَرْلِي سْنِين سْنِينْ
شْطُوطِي مِنْسِيِّينْ
لا شَمسْهَا بْتِطْلَعْ
وْلا نُورْهَا بْيِلْمَعْ
عَ تْلالِك الْحِلْوِينْ
وْمِنْ هَيْك صَار الْوَعدْ
يِتْأَخَّر زْيَادِه
يِدْنَقْ بلَيل الْجُرْدْ
وِيْعَتِّم الْوَادِي
وْوَحْدِي أَنَا نَاطِرْ
وِالْمَوْجْ عَمْ يِعْلاَ
وْتِعْلا مَعُو قْنَاطِرْ
مَا بْيِرْجَعُو أَهْلاَ
أُوفْ مِنِّكْ أُوفْ
يَا مْوَاجْ جِهْلانِه
دَمْعَاتْهَا بِتْطُوفْ
عَ صْخُورْ عطْشَانِه
وِالْوَقتْ مَا لُو عُمرْ
بِيمُوتْ قدَّامِي
بْيِقضِي عَ أَحْلامِي
الْـ عِتْقِتْ عَ إِيد الْجَمرْ
عْلَوَّاهْ لَو فِيِّي
لَوِّنْ بَحرْ أَزْرَقْ
لِعْيُونْ حُورِيِّه
بْتِنْطُر الصَّيْفِيِّه
تَا بْشَمسهَا تِغْرَقْ
وْإِتْسَبَّح قْبَالاَ
وِالْجِسمْ عَمْ يِلْوِي
وْإِشْهَقْ مَع خْيَالاَ
كل ما الشَّمعْ يِضْوِي!