مَاتْ حُبِّكْ مَاتْ
قْبَرْتُو أَنَا بْدَيِّي
عَ شْطُوطْ سَهْرِيِّه
مَا دَغْدَغِتْ نِجْمَاتْ
وْلا رَنْدَحِتْ أَبْيَاتْ
انْسَكْبِتْ بِـ غِنِّيِّه
ماتْ حُبِّكْ.. لَيْشْ؟
وْكَانْ السَّمَا مْضَوِّي
وْوَاقِفْ عَ بَابُو جَيْشْ
مَا بْتَاخْدُو قُوِّه
سْلاحُو أَلف مشْوَارْ
وِرْسُومْ وِحْكاياتْ
وْبَوْسَاتْ تِقْدَحْ نَارْ
وِتْجِنّ سَهْرِيَّاتْ
ماتْ حُبِّكْ ماتْ
وِانْتَهْيِتْ سْنِينُو
وِانْطَفْيِت مْنَامَاتْ
خَلِّت مْحِبِّينُو
يِبْنُوا بْيُوت بْيُوتْ
بِتْزَنِّرَا جْنَيْنَاتْ
وْيِغْرَقُوا بِسْكُوتْ
أَجْمَل مِنِ الْحَكْيَاتْ
مُشْ رَح بْقُولْ: نْدِمتْ
مُشْ رَح بْقُولْ: بْكِيتْ
لكِن وَقتْ ما قِمتْ
عَ جرح قَلْبِي مْشِيتْ
وِصْرَخْتْ مِنْ قَهْرِي
صَرْخِة طفل مَجْنُونْ:
يَا بْيِنْتِهِي عُمْرِي
يَا حُبِّك الْمَلْعُونْ