تعالي نْهد هالعالم ونبني جديد
خلينا نبعد بعيد ونقطع السلسلة
المشكلة واضحة
مو واضحة
وش يفيد؟
أي شيء منتي من حْلوله
هو المشكلة
أن كنت ماني حزين
أكيد ماني سعيد
لأن الحزن والسعادة بينهم مرحلة
المرحلة أسمها : قريب لكن بعيد
فيها تكون الضياع الممتطي أسئلة
أحيان ودي أكون الناس
وأبقى وحيد
وأصبح على خير
ومحدٍ قالي ( من هله )
يا كثر ما أبرد
وأنا فيني يذوب الحديد
وكل هم فيني يقول لصاحبة : أزهله
وأحتاج وألقى على فمي من العز قيد
وأنا أعتبرها كذا
يا الذل
يا المرجلة
عقب عرفت البشر غايات
وين العبيد؟
وعقب عرفت التذاكي
زادت المهزلة
ويحضر بدمعة
ويغيب بضحك وجه الفقيد
اللي لو يرد للدنيا
نبي نقتله
أنا أفكر وأحلل كل حاجة وأعيد
واللي أعرفه عرفته
بس ذاك أجهله
المسألة حايرة بين المطر والجليد
هذاك وش جمّدة؟
وهذاك وش نزله؟
ووش يثبت أن الشهيد
اللي توفى شهيد؟
للدين؟ ولا الوطن؟
ومن يدفنه؟
قاتله؟
أحس ينزف من أفكاري وعقلي صديد
وأن التعب لي قدر محتوم وأستاهله
جيتك من الشعر وحدي
بس ماني وحيد
هي أنتِ المشكلة
ونْهاية المشكلة