بكرة الحياة تبتسم
وأضحك لها تانى
والمر هتبدله
بالحلو ف لسانى
وأرمى حمول الزمن
وأقول لأحزانى
أنا اللى كاسي اتملا
منك وفضيته
والقلب لما اشتكى
بالصبر وضيته
ودموعى متحجرة
والعزة وخدانى
أمانة يا دنيتى
ما تشمتى الأحزان
زفى بشموع الفرح
ضحكة وآمال وأمان
ولونيلى الهنا
وزهزهى الألوان
خلينى أشوف ضحكتى
من الفؤاد دغرى
وامسح دموع الفرح
من قبل ما تجرى
وأقول يا سعد اكتمل
رجعت ليالى زمان
وحشتنى بسمة شفايف
طالعة من قلبى
للناس تبان ضحكتى
والهم متخبى
واضحك ف عز الألم
والقلب متعبى
أخاف تبان ذلتى
واضعف أمام الناس
يزودوا لوعتى
ويعبوا تانى الكاس
وأنا اللى كاس الألم
فى حضنى متربى
لولا الأمل ما ارتوى
قلبى اللى عاش محروم
صابر على قسمتى
علشان يجينى النوم
وأضحك وأقول يا زمن
مين السعيد ف القوم
كل القلوب اشتكت
مش بس أنا وحدى
هموم ومتقسمة
ومسيرها ها تعدى
والدنيا حالها كدا
ومافيش ألم بيدوم