طاوعينى قبل ما يسبقك
قلبى بقرار يجرح شعورك
ويكون شرارة لاشتعال
ما بين عنادى وبين غرورك
أنا لسة باقى على الوداد
ولسة شايل ذكرياتى
ما تخلنيش انسي اللى فات
واطويه ف صفحة من حياتى
إن كنتى فاكرة إن الفؤاد
اللى انشغل بك هان عليا
أرميه وأسيبه ف سكتك
ينداس عليه قدام عنيا
وأجيك مطاطى ومنحنى
ودموعى تسبق لاعتذار
وأقول يا ريتك تصفحى
أهون عليا الإنتحار
دا المستحيل إني أجيلك
واعتذر مهما يكون
لو حتى كان عمرى التمن
اهون عليا انه يهون
ولا سيبش قلبى ف سكتك
ينداس عليه من حين لحين
وأنا اللى ببداء بالوفا
واللهفة والشوق والحنين
مين اللى قال إن الغرام
لازم يكون هجر وظنون
وغيرة تحرق حبنا
وتسرق النوم م العيون
لو كان دا راح يبقى الغرام
أومال هيبقى الكره أيه
وازاى بتشتاقى للحبيب
ويهون عليكى تعذبيه
أنا بعتذر على كل كلمة حب
زلقت من لسانى
يا زهرة كانت دنيتى
ومالكة إحساسي وكيانى