صباح الخير ياعمر القصيد وهمهمة راعيه
صباحنيرسم البسمه على ثغرك ويزهابك .
صباح الشوق واللهفه وحزن بالصدرتخفيه
صباح الورد وغصون الربيع اللي تغنابك .
انا لي حظ بالدنيا تعبت اسايسه واعطيه
الى من جيت له عاني نهرني قال وش جابك؟ .
وجيتي يابعد عمر الثواني والوله شلتيه
نفضت غبار زلاتي وحظي قام هلابك .
تفز عروقي الخضرا لحرف الشين لاقلتيه
لك الله كل عرقن في وسط قلبي تغذابك .
فديت عيونك النجلا ووجهن بالحلا كاسيه
فديت امك مع خالك وابوك وشلة اصحابك .
غلاك بداخلي يكبر غريبه كيف ماشفتيه
ونا عيني توصيني الى من نمت تصحابك .
عشقتك حلم لو وزع على كل البشرتكفيه
وصرتي ملهمة شاعرحلف مايرخص ترابك .
حبيبي لاقسى وجه الزمان وشاغلك ماضيه
ونامت دمعتك تحضن بقايا رعشة اهدابك .
انا ودي اكون اقرب من احساسك الى بحتيه
وودي لو تخليني اكون اقرب من ثيابك .
تراك بعيني تساوي جميع الكون واللي فيه
ولو صار الزمن ضدك تراني فزعة احبابك!