صباح الخير يا عمر القصيد وهمهمة راعيه
صباح نيرسم البسمة على ثغرك ويزهابك
صباح الشوق واللهفة وحزن بالصدر تخفيه
صباح الورد وغصون الربيع اللي تغنابك
أنا لي حظ بالدنيا تعبت أسايسه وأعطيه
الى من جيت له عاني نهرني قال وش جابك؟.
وجيتي يا بعد عمر الثواني والوله شلتيه
نفضت غبار زلاتي وحظي قام هلابك.
تفز عروقي الخضرا لحرف الشين لاقلتيه
لك الله كل عرقن في وسط قلبي تغذابك.
فديت عيونك النجلا ووجهن بالحلا كاسيه
فديت امك مع خالك وأبوك وشلة أصحابك.
غلاك بداخلي يكبر غريبه كيف ما شفتيه
ونا عيني توصيني إلى من نمت تصحابك.
عشقتك حلم لو وزع على كل البشر تكفيه
وصرتي ملهمة شاعر حلف ما يرخص ترابك.
حبيبي لاقسى وجه الزمان وشاغلك ماضيه
ونامت دمعتك تحضن بقايا رعشة أهدابك.
أنا ودي اكون اقرب من إحساسك إلى بحتيه
وودي لو تخليني اكون اقرب من ثيابك.
تراك بعيني تساوي جميع الكون واللي فيه
ولو صار الزمن ضدك تراني فزعة أحبابك!