تجاعيد جبين الأرض
تستنى المطر
ونا جبيني ينتظر تجاعيد
الفراق إيه بين لما نحلم والحياة
ف سجن الروح مسجون يا جسد
ويوم ما تفلت من بين ضلوعها
... تدوب
والشمس تفلت من غروب
تحضن غروب
ولا عمره هايفيد الهروب
والوقت سرسب من بين كفوف الساعات
والليل كئيب الخطوة
والكل انتباه
دابت عيون الشمس ف عيون القمر
لا الشمس بتحب السهر
ولا هو بيشوف النهار
وانت ... قاعد ف انتظار
عايز تنادى ع اللى راح
وانت منزوع الشفايف؟!
وازاى هاتحلم بالبراح
وانت ساكن قلب خايف؟!
وازاى مش عايز تتوه
وانت ممسوح الملامح؟
والزحام ف العقل جامح
مسكين ...
لما خفت تضيع ملامحك
شلتها ف قلب المراية
اتكسرت
واتبعترت كل الملامح
ويا حبات القزاز
لملم ملامحك
من وشوش الناس
نادى بشفايف غير شفايفك
امنح دفا رموشك
لعيون غير عيونك
افرد جناحك للمدى
إما تعيش صوت
أو تكون يدوب ...
... صدى