خدنا ميراث أو خدنا مقاولة
واحكم فينا حكم علاولة
والعب بينا قمار أو طاولة
احنا المماليك وانت الدولة
انت الأولى تغمّي عنينا
هاتجيبنا أوهاتودينا
اربطنا ف ساقية تدور بينا
احنا ولا قوة ولا حولا
احنا المماليك وانت الدولة
احنا المماليك احنا الجبنا
احنا ملك اللي هيركبنا
احنا خدم للي هيتعبنا
تورك احنا وانت الأولى
احنا المماليك وانت الدولة
اعرضنا في السوق للبيع
واربطنا ف حبل التطبيع
غيّر في الدين والتشريع
صلّي و ولّي لغير القبلة
احنا المماليك وانت الدولة
غلّي العيش وغلّي القوت
خلّي الدنيا علينا تفوت
مش راح ندعي عليك بالموت
ولا لينا في الثورة محاولة
احنا المماليك وانت الدولة
احنا أسراك واحنا عبيدك
واحنا عجينة طرية ف إيدك
مش راح نملك غير تأييدك
حواليك شبّيحة وعتاولة
احنا المماليك وانت الدولة
يعني اعمل فينا ما بدالك
من إيدك لإيدين عيالك
دا مؤكد أمك دعيالك
والدعوة يعلمها المولى
احنا المماليك وانت الدولة
احنا المماليك وانت الدولة