يا هموم يا هموم
بتنام وتقوم
على روس الناس
لابسه سلاسيل
خلاخيل
هلاليل
بتروح وتميل
وتحط تشيل ف عقول
معقول العقل ما جبش ف سوق الناس
ولا حتى مداس؟!!!
يا هموم يا هموم
يا طريق مرسوم
ناحية بيتنا
ولا بيتنا حيطان
ولا حتى بيبان
ولا ليه عتبة
عتباية تقول للعيل قوم خطى العتبة
يا هموم يا هموم
وكلام مفهوم
لأ مش مفهوم
ما تفز تقوم لأجل ما تفهم
الفهم أهو جاى
جاى مغماى
فتحت أنا بيه
ما تشوف يا نبيه
فك العقدة
والعقدة شريط
بيعدى عليه قطر يزمر
والقطر عبيط ساب السكة
يا هموم يا هموم
ونصيب مقسوم
واحد لاتنين
هايروح علي فين وسط المية
والمية الوف
قلبي الملهوف من غير دقة
والدقة شاكوش
بيهد عشوش
يا ضمير مغشوش منهوش معدوم
ياهموم يا هموم
يا طريق مرسوم
والرسمة كانت معووجة
ودتنا بعيد... تاهت تهنا
بقيت مهنة... ان احنا نتوه عن سكتنا
والسكة طريق ناحية بيتنا
ولا بيتنا حيطان
ولا حتي بيبان
ولا ليه عتبة
يا هموم يا هموم
يا هموم يا هموم