ياقطر الفراق استنى
دا حبيبي معاك
ح اكتب له جواب وح اقوله
انا روحي فداك
واهديلك حناني وحبي
حتاخدهم هناك
وان طالت عليك الغربة
أو عزِّت عليك الصحبة
اندهني ولو في منامك
تلاقيني ف خطاك
وأمانه ياساكن قلبي
اكتب لي واوعى تخبي
واشرح لي عن اللي ف
قلبك وحكاية غرامي وحبي
ليه تمشي ياقطر الشوق
وبتاخد حبيب الشوق
ياقطر الفراق على مهلك
د انا قلبي عليه محروق
آه ياعمري اللي جَيّ حزين
ف غيابه ح اعيش مع مين
الوحده اللي مابترحمشي
والسهد ودموع العين
وليلاتي من الفجرية
حاستنى نسايمه الجايه
ح اسألها عن اللي شاغلني
عن روحي وضي عنيه
واحكيلها واعيد ف كلام
عن حبي وعن الأحلام
عن بيتنا اللي كان بيه جنه
عن عيني اللي مش بتنام
ياروايح عبيره الجاية
إحكيله عن الشوق فيا
روحي قولي لحبيب الروح
مايطوِّل غيابه عليا