قرب ياقلبي بلاش بقى هجر وخصام
وتعالى يلا نعيش سوا ف دنيا الغرام
ليه كل ما آجي ياقلبي شايفك تبتعد
هانت عليك العشرة وحلاوة الكلام
ياقلبي اعرف كل دي وزة شيطان
وابعد عن اللي يكبروا ف جرحك كمان
وكفاية دول اللي ماخلوا لحد شيء
عاشوا بيسقوا الكل من كاس الهوان
ياقلبي ولع شمعتك نور طريقك
واعرف ياقلبي مين عدوك مين صديقك
دانا كل مرة بفكرك ع اللي في خاطري
بالقاك ياقلبي تسيبني في بحرك غريقك
ياريت ياقلبي تفتكر كل اللي كان
وياريت نرجع عمرنا لأيام زمان
وتعالى نحلم بالحياه والحب تاني
وتعالى نفرح قبل مايفوت الأوان
ياقلبي عايزك تبتدي صفحة جديدة
وتعالى يلا نخلق الدنيا السعيدة
وان جانا حد هايبعدك عني ياغالي
خليه لوحده ينكوي بنار المكيدة